Xəbər lenti‎ > ‎

Şəkinin elmi ictimaiyyətinə ağır itki üz vermişdir

Отправлено 30 сент. 2014 г., 5:52 пользователем Murad Nabibekov   [ обновлено 30 сент. 2014 г., 6:31 ]

    Tanınmış gənc memar, AMEA Şəki Regional Elmi Mərkəzinin Folklorşünaslıq və el sənətləri laboratoriyasının rəhbəri, Azərbaycan Respublikası Memarlar İttifaqının üzvü, memarlıq üzrə fəlsəfə doktoru İRADƏ RÖVŞƏN (İradə Rövşən qızı Məmmədova) bu gün ömrünün 46-cı ilində dünyasını dəyişmişdir. 


    İradə Məmmədova (Abdullayeva) 1968-ci il may ayının 15-də Şəkidə ziyalı ailəsində anadan olmuşdur. 
Atası mühəndis kimi uzun illər yol-körpü tikintisi ilə məşğul olmuş və işi ilə əlaqədar ailəsi ilə birlikdə tez-tez yaşayış yerini dəyişmişdir. Bu səbəbdən də o, orta məktəbi Zaqatala şəhərində bitirmişdir.
    Uşaqlıqdan rəssamlığa böyük marağı olan İradə Rövşən 1985-ci ildə orta məktəbi əla qiymətlərlə bitirdikdən sonra Azərbaycan İnşaat Mühəndisləri İnstitutunun “Memarlıq” fakültəsinə daxil olmuş, 1990-cı ildə ali təhsilini başa vurub ailəsi ilə birlikdə Şəkiyə qayıtmış və 
AMEA-nın Şəki Regioanl Elmi Mərkəzində əmək fəaliyyətinə  başlamışdır. 
    Gənc mütəxəssisin tədqiqatçılıq qabiliyyətini nəzərə alan AMEA-nın Memarlıq və İncəsənət İnstitutunun Elmi Şurası “Şəki yaşayış evlərinin interyeri” mövzusunu İradə Məmmədova üçün dissertasiya mövzusu kimi təsdiq etmişdir. Böyük maraqla və həvəslə tədqiqatçılıq fəaliyyətinə başlayan dissertant bu çətin və maraqlı mövzunun öhdəsindən layiqincə gəlmişdir. Onun apardığı tədqiqatın elmi yeniliyi və aktuallığı Dissertasiya Şurasının üzvlərindən yaradılmış komissiya tərəfindən verilmiş rəydə yüksək qiymətləndirilmişdir. 
    Üç illik gərgin elmi axtarışların müsbət nəticəsi 2007-ci il dekabrın 25-də özünü doğrultdu. Həmin gün İradə Rövşən qızı Məmmədova Azərbaycan Memarlıq və İnşaat Universitetinin ixtisaslaşdırılmış Elmi Şurasında “Şəki yaşayış evlərinin interyeri (XVIII əsrin axırı-XX əsrin əvvəlləri)” mövzusunda dissertasiya işini müdafiə edərək memarlıq namizədi alimlik dərəcəsi adına layiq görüldü. İşlədiyi müddətdə onun “Şəki yaşayış evlərinin interyeri (XVIII əsrin axırı-XX əsrin əvvəlləri)” adlı kitabı və respublikamızda, eləcə də xarici ölkələrdə çoxsaylı elmi məqalələri dərc olunmuşdur. 
    İradə Rövşən 2008-2013-cü illərdə Şəki Regional Elmi Mərkəzində elmi katib vəzifəsində və sonra ömrünün son günlərinədək Şəki Regional Elmi Mərkəzinin Folklorşünaslıq və el sənətləri laboratoriyasının rəhbəri vəzifəsində çalışmışdır.
    Gənc alim, səmimi insan, dəyərli dost olmuş İradə xanım onu tanıyanların qəlbində daim yaşayacaqdır.
    Allah rəhmət eləsin.